Салкын җилләр дулап искән чакта

Йөрәгеңә үтсә салкыннар,

Хәтерлә син бергә булган чакны,

Мәхәббәтенең кайнар ялкынын.

Шул вакытта туңган җаның эрер,

Сөю кагар күңел ярыңа.

Хыялларың сине алып кайтыр,

Саф сөюле яшьлек языңа.

Авыр чакларыңда исеңә төшер,

Сөю булып сиңа килермен.

Яшәр өчен әгәр көчең бетсә,

Җылы сулыш сиңа өрермен.

Беркайчанда онытма син мине,

Син онытсаң, мин дә туңармын.

Сүндерә алмас беркем минем җанда

Янып торган сөю учагын.