Бир тууганым

Бир тууганым, кагылайын Жан бирге,

Кабак бүрксөң, кайгырамын кай бирде.

Тагдыр деген жолу татаал турбайбы,

Кээде таштак, гүлгө оройт кээ бирде.

Бир тууганым, ата мурас чырагым,

Чаңкаганда мөлтүр кашка булагым.

Бул жашоодо кайрат берип жөлөгөн,

Аска тоом, бел таянар мунарым.

Бир тууганым, ата энемден белексин,

Бул өмүрдө баарың мага керексин!

Мүдүрүлсөм татаал жолдо сыноого,

Кулатпастан жөлөп калчу тирексин.

Бир тууганым бийик өскөн чынарым,

Ата энемден калчу ыйык тумарым.